KORONADAL CITY – Nagapadayon ang imbestigasyon sang mga otoridad sa nagluntad nga pagpangluthang-patay sa isa ka tricycle driver sang riding-in-tandem ala-1:50 kaina sang kaagahon, Sabado, Oktubre 19, diri sa siyudad sang Koronadal City.
Ginkilala sang Koronadal City PNP ang biktima nga si Mallie Ido Sanday, 34-anyos may asawa kag residente sang Purok Kings Compound, Barangay General Paulino Santos, Koronadal City.
Suno kay Esmael Abdul, hinablos sang biktima antes nagluntad ang insidente may nakaaway nga duha ka unidentified persons ang tiyo sini nga naglab-ot pa sa pagsumbaganay sang biktima kag mga suspek.
Natabuan man nga nagpadulong ang tricycle nga ginamaneho ni Gulama Sanday, utod ni Esmael kag ginbuligan sini ang ila tiyo kag ginpasakay agud nga makapalagyo apang pag-abot sang mga ini sa atubangan sang isa ka pribado nga establisyemento komersiyal sa Paredes St., Brgy. Zone 4, hinali nga may nag-abot nga Gray NMax nga motorsiklo sakay ang duha ka lalaki kag ginpaulanan sila sang bala.
Gilayon naman nga nagpalagyo ang mga suspek matapos nga himuon ang krimen.
Gindala pa sa South Cotabato Provincial Hospital ang biktima apang gindeklarar na ini nga dead on arrival.
Nakuha sa crime scene ang 7 ka fired cartridges sang caliber 45 nga armas luthang nga gingamit sa pagpatay sa biktima.
Sa karon, ginahibalo pa sang mga otoridad ang motibo sang krimen.
