KORONADAL CITY – Naaresto sang mga otoridad ang isa ka tricycle driver matapos magpatigayon sang search warrant operation sa puluy-an sini sa Sitio San Roque, Guinsang-an, Sto. Niño, South Cotabato kaagahon sang Domingo, Agosto 25, 2024.
Ginkilala ni Police Major Raymon Faba, hepe sang Sto. Niño Municipal Police Station ang suspek nga si alyas “Gerald”, 48-anyos, may asawa, tricycle driver kag residente sang nasambit nga lugar.
Suno kay PMaj. Faba, alas-03:43 sang kaagahon sang ginsalakay sanng gintingob pwersa sang Sto. Niño MPS, SCPIU, SCPPDEU kag 2nd SCPMFC ang puluy-an sang suspek kag diri nakuha ang lima ka pakete sang ginapatihan nga shabu, isa ka tooter kag isa ka lighter.
Natalana nga pasakaan sang kaso nga paglapas sa R.A 9165 ukon Comprehensive Dangerous Drugs Act of 2002 ang suspek.
Samtang, ginpasiguro naman sang kapulisan nga magapadayon ang ila operasyon sa pagtapna sa illegal nga droga sa lugar.
