KORONADAL CITY – Nagapadayon ang imbestigasyon sang mga otoridad sa nagluntad nga pagpangluthang-patay sa isa ka tricycle driver sa Purok Sentro, Brgy. San Jose, Koronadal City pasadoa alas-8 kagabi.
Ginkilala ni Barangay Kapitan Danilo Simtim sang Barangay San Jose ang napatay nga si Ace Mecenas, 29 anyos, may asawa, tricycle driver, residente sang Brgy. Palavilla, Lutayan, Sultan Kudarat.
Sa interview sang Bombo Radyo Koronadal kay Kapitan Simtim, ginpahibalo lamang sa iya ang natabo nga pagluthang kay Mecenas.
Nakita suno pa sang mga residente nga una nakaresponder sa crime scene ang sitwasyon sang biktima nga gintiro sang suspek nga nakamotorsiklo nga gilayon man nagpalagyo matapos himuon ang krimen.
Lunsay igo sa likod nga bahin sang iya lawas ang naangkon sang biktima nga nadala gilayon sa hospital apang gindeklarar nga dead on arrival sang doktor.
Sa karon, indi pa matumod ang motibo sang krimen kag kun sin-o ang responsable sa pagluthang sa biktima.
Nahibaluan nga papuli na kuntani kagab-i ang bikitima upod ang asawa sini sang natabo ang pagluthang sa iya.
Suno kay Kapitan Simtim, nagaarkila lamang sang tricycle nga ginamaneho sini ang biktima.
