KORONADAL CITY – Ginalauman nga magagutok ang trapiko sa Toronto, Canada kasunod sang ginaangan-anganan nga Game 5 sa ila ginasuportahan nga team batok sa karibal nga Golden State Warriors sa nagapadayon nga NBA Finals.
Suno kay Bombo International Correspondent Jean Mansilla Yap, ginpahayag sini nga working day ang adlaw sang Martes gani magagutok ang dalagan sang trapiko ilabi na sa homecourt sang Toronto Raptors pagahiwaton ang Game 5.
Samtang ginbuyagyag man ni Yap nga may mga offers na agud magpabilin sa Raptors si Kawhi Anthony Leonard.
Kalakip na diri ang tanyag sang mga bilyonaryo sa Canada kun sa diin makapili si Leonard sang anuman nga penthous nga nagabalor sang minilyon nga dolyares.
May yara man suno pa sang restaurants nga nagatanyag kay Kawhi sang tatlo ka free dining tubtob sa kabuhi.
Nagapati ang mga ini nga dako ang mabulig ni Leonard agud makuha sang Raptors ang kampeonato sa NBA Finals nga kun magadaog, mangin maragtason para sa nasambit nga pungsod.
