KORONADAL CITY- Nagpanawagan sa subong ang mga Overseas Filipino Workers (OFW) sa pungsod Kuwait nga panindugan ni Pangulong Rodrigo Duterte ang pagpatuman sang total deployment ban sa nasambit nga pungsod.
Suno kay Bombo International Correspondent Nova Melanie Castor halin sa Brgy Zone 3 syudad sang Koronadal, 5 ka tuig na nga nagatrabaho nga DH sa Kuwait, indi dapat magbag-o ang paminsar sang pangulo apisar nga storyahun pa sang mga opisyal sang nasambit nga pungsod.
Dugang pa, sa tion nga pagabawion sang Pangulo ang iya nga desisyon, mangin karadlawan lang ang mga Filipino kag pagakabigun nga “mukhang pera” ang gobyerno sang Pilipinas.
Kun nasarangan suno pa sang iban nga pungsod nga magpatuman sang total deployment ban sa Kuwait, masarangan man sang Pilipinas nga mas maalam kun ikumparar sa iban nga lahi.
Apisar nga maayo ang employer ni Castor sa Kuwait, pabor ini sa nasambit nga tikang sang gobyerno bnangod aminado siya nga madamo ang ginaabuso nga Pinay DH sa pungsod kun sa diin siya naga-ubra.
Kadungan sini, ginahingyu man ni Castor kag sang ila grupo nga Guardians International sa Kuwait sa gobyerno sang Pilipinas nga sa tion nga magupod sila sa voluntary repatration, may yara sila sang kasiguruhan nga madangtan sa Pilipinas.
