KORONADAL CITY- Magahatag sang bag-o nga lasa sa mga South Cotabateños ang igalunsar nga paghimo sang tilapia ice cream sa probinsya.
Sa interbyu sang Bombo Radyo Koronada kay South Cotabato Provincial Agriculturist Justina Navarrete nga yara sa 30 ka mga fish farmers ang igapaidalum sa training sa paghimo sang tilapia ice cream subong nga bulan sang Mayo.
Pagatun-an sa nasambit nga training ang paghimo sini, ang proseso kag mangin ang pag-engganyo sa mga manugbakal agud matilawan ang nasambit nga pinasahi nga ice cream flavor.
Dugang pa nga sa oras nga matapos sang 30 ka fish farmers ang nasambit nga training, sila naman ang magapakigbahin sang ihibalo sa paghimo sini sa mga luyag man nga makatuon.
Nahibaluan nga kasubong sa Davao City nga may crocodile ice cream nga ginadayo sang mga turista, ginalauman man nga mas magapabaskog pa ini sang turismo sa probinsya sang South Cotabato.
