Nagpromisa si Thailand Prime Minister Anutin Charnvirakul nga magpatuman sang mas hugot nga layi bahin sa mga armas matapos ang pagpangluthang sang isa ka 14-anyos nga estudyante sa Nonthaburi nga nagresulta sang pagkapatay sang walo ka indibidwal kag pakapilas sang 22.
Una nga ginpatay sang menor de edad ang iya mga lolo kag lola antes siya nagkadto sa Debsirin School, diin ginluthang niya ang lima ka manunudlo kag sang ulihi ginutas ang kaugalingon.
Suno sa pulisya, ang armas kag mga bala nga gin-gamit iya sang iya lolo kag legal nga narehistro.
Ginpahayag sang punong ministro nga ang bag-o nga layi magalimita sa pagbitbit sang armas sa publiko, kag ang mga opisyal lang sang gobyerno nga yara sa ila katungdanan ang tugutan nga magbitbit sini.
Ang insidente nagpasanyog liwat sang diskusyon bahin sa madamo nga sibilyan nga nagaangkon sang armas sa Thailand, nga ginabulubanta nga nagaabot sa 10.3 milyon, lakip na ang apat ka milyon nga ilegal.
Padayon pa ang imbestigasyon sang mga awtoridad agod matukiban ang dugang nga detalye sa likod sang makahaladlok nga pagpangluthang sa nasambit nga buluthuan.
