KORONADAL CITY – Mas hugot subong ang pagbantay sang local government unit sang Tampakan, South Cotabato sa mga karne kag livestock nga magasulod sa ila banwa.
Ini makaligad ginpatuman ni Tampakan Mayor Leonard Escobillo ang marching order nga ipatuman ang temporaryo nga lockdown bangud sa ginakabalak-an nga African Swine Fever (ASF).
Sa interbyu sang Bombo Radyo Koronadal kay Mayor Escobillo, tinutuyo sini nga malikawan ang paglapta sang suspetsado nga ASF sa ila lugar halin sa Koronadal City.
Magluwas diri, isa ka task force ASF man ang ila gindihon nga ginalakipan sang PNP-12, Tampakan PNP, Regional Mobile Force Battalion (RMFB)-12, traffic enforcers, MDRRMO, kag Department of Agriculture.
Sa subong anom ka entry points pasulod sa ila banwa ang naka-lockdown.
Dugang sang mga alkalde, tanan nga mga salakyan nga magaagi ang ginapaidalom sa water spraying, samtang ginapapanaog naman ang mga pasahero kag ginapa-footbath.
Ginadumilian man nga magsulod ang anuman nga livestock ukon processed meat nga wala sang certificate halin sa Provincial Veterinary Office.
Sa subong suno kay Escobillo, nakakinot na sila sang 40 kilos sang karne kun sa diin ginsulod suno pa ang mga ini sa isa ka drum nga puno sang disinfectant agud indi na maglapta ang balatian.
