Nakahimo sang bag-o nga rekord ang American pop superstar nga si Taylor Swift bilang most-awarded solo artist sa maragtas sang prestihiyoso nga MTV Video Music Awards.
Ini matapos pito gid ang iya nadag-an subong nga tuig sa seremonya nga ginpatigayon sa UBS Arena sa New York.
Lakip diri ang awards nga Video of the Year, Best Collaboration, Best Direction, Best Editing, Song of the Summer sa Fortnight feat. Post Malone, Best Pop kag Artist of the Year.
Bangud sini, kabug-usan nga 30 ka Moonman trophies na ang naangkon sang 34-anyos nga singer-wongwriter nga lapaw pa sa solo artist record ni Beyonce nga may 26 wins.
Magluwas diri, ang All Too Well singer ang nakaguba man sa iya kaugalingon nga rekord sang nadag-an sini ang Video of the Year award nga amo ang nagahimo sa iya bilang isahanon nga artist nga nakadaog sa amo nga pasidungog sa tatlo ka sunod-sunod nga tuig.
Nahibaluan nga 2024 VMA, may 12 ka nominasyon para kay Taylor. Nagtambong siya sa red carpet event nga nagasuksok sang edgy plaid corset nga may train kag high-waisted velvet shorts halin sa Dior.
Ginpasalamatan sini ang iya fans sa pagboto sa VMA honors kag naghingyo man sa publiko nga magboto para sa palaabuton nga US presidential elections.
Una sini gin-endorso ang Democrat candidate nga si Vice President Kamala Harris sa Instagram post sang Martes, apang wala na niya gin-mensyonar ang pangalan sini sa seremonya.
Abril sang gin-release sini ang official music video para sa Fortnight nga isa sa mga kanta sa iya latest album nga The Tortured Poets Department.
Ini ang iya 11th album kasunod sa Midnights (2022), Evermore (2020), Folklore (2020), kag Lover (2019), kag ang iya apat ka re-recorded albums nga 1989 (Taylor’s Version), Speak Now (Taylor’s Version), Red (Taylor’s Version), kag Fearless (Taylor’s Version).
