Uso gid subong amo ang crop tops ilabi na sa kababainhan.
Mahapos abi ini suksukon, mabugnaw, kag komportable kaayo.
Bisan gani sa lalaki, napa-crop top man pati ang two-time Olympic gold medalist nga si Carlos Yulo nga gin-istoryahan gid sang halos bilog nga Pilipinas nga mahilig sa fashion trend.
Apang paano kun bangud sa imo crop top, papanaugon ikaw sa salakyan?
Natabo ini sa tatlo ka babaye nga interesado gid subong nga mag-file sang reklamo batok sa isa ka kumpaniya sang eroplano matapos sila ginpapanaog bangud lang sa ila ginasuksok.
Nagsugod ang insidente sang nagsakay ang mag-abyan nga sanday Tara Kehidi kag Teresa Araujo nga halin sa Los Angeles, California kag pakadto kuntani sa New Orleans, Louisiana.
Sang nagsaka pa lang ang duha, may sweater pa sila, apang gin-uba man nila ini bangud wala pa ginapaandar ang air conditioning system sang cabin samtang wala pa naka-take off.
Pagkadugay-dugay, suno sa istorya sang duha, nagpalapit na ang lalaki nga flight attendant kag agresibo sila nga ginsilingan nga magsuksok sang bayo.
Nabatian ini sang isa pa ka babaye nga pasahero nga si Carla Hager nga sang amo nga tion may upod nga bata nga lalaki.
Ginsuportahan sini ang mag-abyan bangud magin-ot gid man sang amo nga tion, kag timing man nga naka-crop top siya kag naka-sweater.
Bangud sa komosyon, gin-uba man sini ang iya sweater bangud gusto gani sini ipakita ang iya suporta sa mag-abyan bisan indi man sila kilalahay.
Sang ulihi, baw… tatlo gid sila ang ginpapanaog sa flight kag wala ginhatagan sang refunds!
Bisan ang ikatatlo nga babaye, wala nakaluwas gani amo man ang bitbit sini sa iya bata samtang ginpaguwa sa aircraft.
Suno kanday Tara kag Teresa, ginsilingan pa nila ang attendant kun pwede nga masuksok lang sila liwat sang sweater, apang wala na ginpasugtan kag “ulihi na ang tanan.”
Naggasto naman ang duha sang 1,000 USD ukon P57,000 para sa last-minute flight pakadto sa New Orleans bangud didto sila maga-selebrar sang birthday ni Tara.
Tuman ang kalain sang ila buot sa natabo bangud daw kaangay suno sa ila nga ginkabig sila nga mga criminal bangud lamang sa ila crop top.
Base sa Contract of Carriage sang airline company, mahimo nila balabagan ang customer ukon pasahero kun sila ang naga-tiniil lang ukon indi nagakaigu ang bayo. Wala man sini ginpahangop kun ang buot-silingon nila sa “lewd, obscene, or offensive in nature” nga mga bayo ang nagalakip pati sa mga crop-top.
