Arestado ang tatlo ka mga indibidwal sa pag gamit sang ilegal nga droga sa nag kalain-lain nga operasyon sa tatlo ka banwa sa probinsya sang South Cotabato sang tinalikdan nga adlaw, Ini ang ang resulta sa padayon nga kampanya batok sa ilegal nga droga sang South Cotabato Police Provincial Office (SCPPO) kag sa idalom ni PCOL SAMUEL T. CADUNGON, Provincial Director.
Takna alas Mga 7:48 sa aga, sa Brgy. Poblacion, T’boli, South Cotabato, ang mga nagtingob nga elemento sang SCPPDEU, T’boli MPS, MDEU, 2nd SCPMFC, kag SCPIU sa koordinasyon sa PDEA 12, madinalag-on nga nagpatuman sang Search Warrant nga nagresulta sa pagdakop kay alyas “Kulot”, 36 anyos ang edad. Nakuha sa iya pagpanag-iya ang ginabanta nga 15 ka gramo sang ginapatihan nga shabu nga nagabalor ₱102,000.00, buhi nga mga bala, kag nagkalain-lain nga kagamitan sa pagdroga.
Samtang, mga alas 4:58 sa hapon, ang mga operatiba sang Tupi MPS, sa koordinasyon sa PDEA 12, nagpatigayon sang buy-bust operation sa Brgy. Poblacion, Tupi, nga nagresulta sa pagdakop kay alyas “Jeloy”, 25 anyos ang edad. Nakuha sa iya ang ginapatihan nga shabu nga nagabug-at sang mga 1.0 ka gramo nga nagabalor ₱6,800.00, lakip ang gimarkahan nga kwarta kag iban pa nga non-drug nga ebidensya.
Pagligad sang pila ka minutos, mga alas 5:08 sa hapon, ang mga nagtingob nga elemento sang Polomolok MPS (lead unit), SCPDEU, kag SCPIU, madinalag-on nga nagpatigayon sang isa pa ka buy-bust operation sa Brgy. Pagalungan, Polomolok, nga nagresulta sa pagdakop kay alyas “Allan”, 55 anyos ang edad, isa ka retirado nga miyembro sang AFP. Nakuha sa operasyon ang duha ka sachet sang ginapatihan nga shabu nga nagabug-at sang 5.1 ka gramo, nga nagabalor sang mga ₱34,000.00, lakip ang kwarta nga gingamit sa buy-bust kag isa ka itom-kahel nga pouch.
Ang tanan nga mga suspek ginpahibalo sang ila mga kinamatarong nga ginagarantiya sang konstitusyon kag karon yara sa kustodiya sang pulis samtang ginahulat ang pagpasaka sang nagakaigo nga mga kaso para sa paglapas sang Seksyon 5, 11, kag 12, Artikulo II sang RA 9165, kag RA 10591.
