KORONADAL CITY – Ikinatuwa ng isang van driver ang pagkilala sa kanya hindi lamang sa Lungsod ng Koronadal, kundi sa buong probinsya ng South Cotabato dahil sa kanyang katapatan.
Kung maaalala, naging viral sa social media sa pamamagitan ng Bombo Radyo Koronadal ang pagbalik ni Alex Magno, driver ng van, ng malaking halaga ng pera na naiwan ng kanyang pasahero.
Dahil dito, labis ang pasasalamat ng ama ng pasaherong nakaiwan ng pera dahil estudyante ang anak nito at pang tuition fee ang libu-libong perang naiwan sa kanyang sasakyan.
Samantala ayon kay Magno, hindi nito nais na kilalanin sya sa kanyang ginawa at bigyan ng papuri.
Gusto lamang daw nitong ipakita sa kanyang tatlong anak na sa kabila ng mahirap na buhay, mas dapat mangibabaw pa rin ang katapatan at pagiging kontento sa buhay at hindi magkaroon ng interes sa mga bagay na hindi pinaghirapan.
