KORONADAL CITY – Bangud sa wala untat nga operasyon sang mga otoridad boluntaryo nga nagsungka sa Regional Mobile Force Batallion 12 ang isa ka myembro sang Communist Terrorist Group (CTG) sa Sitio Sampinitan, Barangay Ned, Lake Sebu, South Cotabato.
Ginkilala ni Police Lieutenant Colonel Roy Romualdo, Officer In-Charge sang RMFB 12 ang nagsungka nga rebelde nga si alyas “Samuel”, 51 anyos, residente sang Barangay Carpenter Hill, Koronadal, South Cotabato, kag anay myembro sang terorista nga grupo gikan sa Daguma Guerilla Front 73 nga nagapatigayon sang operasyon sa kabukiran sang T’boli, Banga, Tupi kag Koronadal, South Cotabato.
Nagdesisyon nga magpanaug kag magsungka ang anay rebelde sa RMFB 12 bangud sa kapigaduhon kag pressure dala sang padayon nga pagpatigayon sang Major Internal Security Operation (ISO).
Sa karon, yara sa pag-inakop sang RMFB 12 ang anay nga rebelde kag nagapakig-angot na ang mga otoridad sa LGU agud nga mapaidalom ini sa Enhance Comprehensive Integration Program (E-CLIP).
Gindayaw naman ni PLtCol Romualdo ang operating troops sa matawhay nga pagsungka sang nasambit nga anay myembro sang CTG.
