KORONADAL CITY – Positibo sa African Swine Fever (ASF) ang pila ka barangay sa siyudad sang Tacurong kag tatlo pa ka banwa sa probinsiya sang Sultan Kudarat.
Ini ang ginkumpirmar ni Sultan Kudarat Provincial Veterinarian Dr. Edwin Naci.
Suno sa opisyal, ang tatlo ka mga banwa nga may kumpirmado nga kaso sang ASF ang ginalakipan sang Columbio, Bagumbayan kag Isulan.
Sa siyudad sang Tacurong napagkit ang ASF sa mga barangay Baras, Katungal kag Kalandagan.
Samtang sa banwa sang Columbio ang mga barangay nga infected sang ASF amo ang Barangay Lasak, Batangan, Telafas; Barangay Daguma naman sa Bagumbayan kag Barangay D’Lottilla sa banwa sang Isulan.
Apang, ginpasalig ni Dr. Naci nga sa masunod nga bulan sang Agusto ukon Setyembre, magaabot ang vaccine para sa mga baboy nga paga-gamiton sa trial.
Magluwas sini, may mga suspected cases naman sa Lambayong nga ginamonitor sang Provincial Veterinary Office.
Aminado ang mga ini nga mabudlay ang pagmonitor sa mga kabaranggayan bangud nagsugod na ang mga ini sa pag-ihaw sang mga hinuptan nila nga baboy sa kabalaka nga kuhaon kag ipaidalom sa test.
Kaangot sini, nagpahanumdom ang PVET nga bantayan ang mga baboy kag siguruhon nga indi mangin infected sang ASF.
