KORONADAL CITY– Nagtuga sang kahadlok sa mga pumuluyo sang syudad sang Koronadal ang nagluntad nga bomb scare partikular na sa Morales Avenue malapit sa merkado publiko sang syudad.
Nahibaluan nga isa ka maleta kag 2 ka backpacks ang ginbilin sa isa ka pawnshop kun saa diin nagtuga ini sang pagkaalarma kag kahadlok ilabi na sa mga nakatambay nga mga traysikel drivers kag mga bystanders nga nagalantaw sang NBA finals sa kalapit nga establisemento.
Suno kay Koronadal City Local Government Operations Officer o CLGOO Juanito Agullana gilayon nga nagresponder ang South Cotabato Explosive Ordnance Disposal Team sa lugar kag ginkordon sang Koronadal City PNP ang lugar kun sa diin ginlab-ot sang masobra 2 ka oras ang pabudlayanay nga pagdisrupt sang makaduluda nga mga butang.
Sa ulihi madinalag-on nga nadisrupt ang 2 ka backpacks kag isa ka maleta kag natukiban nga lunsay mga bayo ang unod sang mga ini.
Nahibaluan nga nakaalerto sa karun ang syudad bangud sa plano nga pagretaliate suno pa sang Bangsamoro Islamic Freedom Fighters makaligad nga madakpan ang mga kaupdanan sang mga ini nga nagpamomba sa Christ the King Cathedral sa syudad sang nakaligad nga Abril 29, 2018.
