Nagahingyo sang bulig ang biktima sang pagpang-motornap sang Radier 150 sa Brgy. Zone 4, Koronadal City sang Lunes sang hapon nga madakpan ang suspek.
Ini matapos nga makuhaan sang CCTV footage ang suspek nga mataas, itom ang buhok, kag nagasuksok sang duag blue nga jacket.
Nakit-an mismo sa CCTV footage nga ini ang nagkuha sang motorsiklo sa atubang sang tindahan kag gilayon nga nagpalagyo matapos ang insidente.
Kaangot sini, nagapanagawan si Kagawad Senen Pingoy sang Brgy. Zone 4 sa mga pumoluyo nga halungan gid ang ila tagsa-tagsa ka gamit, pareho sang motorsiklo, tungod sang nagluntad nga motornapping incident.
Suno sa iya sa interview sang Bombo Radyo Koronadal, bangud yara sa sentro ang barangay, indi na nila mahibaluan kon sin-o ang naga sulod sa ila bangud sa kadamo sang tawo.
Dugang pa niya, importante gid nga makigkoordinar sa mga kapulisan para sa seguridad sang lugar kag sa ano man nga sahi sang insidente.
Panawagan man niya sa mga nagakuha sang motorsiklo nga untatan na ini, kay dako nga kaso ang ila pagaatubangon suno sa laye.
Una diri, padayon man ang kapulisan sa mga residente kag sa bisan sin-o nga may impormasyon parte sa suspek o sa ginapanaguan sini nga magkoordinar sa PNP sa pinakamalapit nga estasyon sang pulis ukon tawagan ang hotline agud mabuligan ang imbestigasyon.
