KORONADAL CITY -Natumod na sang mga otoridad ang mga suspek sa nagluntad nga pagpang ambush sa duha ka pulis sa Cotabato City na nagresulta sa pagkapatay sang isa kag pilason naman ang kaupdanan sini.
Sa eksklusibo nga interbyu sang Bombo Radyo Koronadal kay Police Senior Supt. Michael Libanan, hepe sang Cotabato City PNP duha ka anggulo ang ila nga ginatun-an nga possible nga motibo sa krimen.
Posible suno pa nga personal grudge ukon may kaangtanan sa trabaho ang rason sang ambush sa mga pulis nga katapo sang Cotabato Mobile Force Company.
Ginkilala ni Libanan ang napatay nga si PO1 Ali Bago Mama, 26 anyos, may asawa, kag residente sang President Quirino, Sultan Kudarat samtang padayon naman nga ginbulong sa ospital ang kaupod sini nga si PO1 Jolace Alim Guiamad, 26 anyos nga residente sang Datu Paglas, Maguindanao.
Ginpasiguro naman sang opisyal nga mapasabat ang mga kag magapangatubang sa kaso.
Sa subong ginpahinumduman man sini ang mga katapo sang pulis na magdoble halong ilabi na nga yara saa trabaho apang indi suno pa dapat nga magkahadlok sa anuman nga karahasan sang indi maayo nga mga tawo.
