KORONADAL CITY – Padayon ang ginapatigayon nga interogasyon sa isa ka bomber makaligad nadakpan sa ginpatigayon nga operasyon sa bahin sang Maguindanao.
Sa interbyu sang Bombo Radyo Koronadal, ginkilala ni Isulan PNP chief of police Lt. Col. Junie Buenacosa ang suspek nga si Toten Karin Kuti, 27 anyos kag residente sang Brgy. Madia, Datu Saudi Ampatuan, Maguindanao.
Suno kay Buenacosa, nadakpan si Kuti sa iya puloy-an sa Brgy. Madia sa bisa sang arrest warrant nga ginserbe sang Isulan PNP kabulig ang PRO-12 Regional Intel Division, 2nd Mechanized Battalion sang Philippine Army kag sang Maguindanao Police Provincial Office.
Ginaangot man ang nasambit nga suspek sa mga insidente sang pagpamomba kasubong sang Isulan bombing sadtong Agosto 28, 2018 kag ang hana nga pagpamomba sa parada ni anay Isulan Mayor Diosdado Pallasigue sang Marso 2016 kun sa diin target ang nasambit nga alkalde.
Nagapangatubang si Kuti sa duha ka counts sang kaso nga murder kag multiple frustrated murder.
Dugang ni Buenacosa, may mga impormasyon na suno pa sila nga nakuha kaangot sa mga posible nga kaupdanan ni Kuti nga naulamid sa pagpamomba sa Isulan kag sa kaiping nga mga lugar.
