KORONADAL CITY- Yara na sa kustodiya sang mga otoridad ang isa ka ginapatihan nga myembro sang ISIS-Inspired terror group nga Ansar Al-Khilafah Philippines sa banwa sang Polomolok, South Cotabato.
Suno kay PSupt Samuel Cadungon, hepe sang Polomolok PNP ginkilala ang naarestar nga suspek nga si Aladin Mamo sa ginpatigayon nga raid sang PNP kag AFP sa Sitio Bio, Brgy Lapu sa nasambit nga banwa apang nakapagyo naman ang utod sini nga si Russel Mamo.
Narekober man suno pa sa posisyon ni Aladin ang isa ka Improvised Explosive Device ukon IED kag granada.
Gina-angot man suno pa ang mag-utod bilang remnants sang Al Khilafah Local terror group sa idalom ni Jeffrey Nilong, nga amo naman ang ginatudlo nga utok sa nagluntad nga pagpasigabong sang bomba sa atubang sang birthing clinic sa Brgy Apopong, General Santos City sang Setyembre 2019 nga nagbilin sang 8 ka patay.
Ang grupo man sini ang gina-alegar nga responsable suno pa sa mga serye sang krimen kasubong sang robbery, carnapping kag gun for hire sa banwa sang Polomolok kag kaiping nga lugar.
Si Nilong man ang nagatindog suno pa nga lider sang grupo makaligad nga mapatay sa isa ka engkwentro sang Enero 2017 ang anay lider nga si Mohammad Jaafar Maguid.
Sa karon, natalana na nga sang-atan sang kaso ang mag-utod kag padayon man ang manhunt operation batuk sa nakapalagyo nga si Russel.
