KORONADAL CITY- Ginsaysay ekslusibo sa Bombo Radyo Koronadal sang isa sa mga survivors sang pagpasigabong sang Improvised Explosive Device sa General Santos City kun paano ini nakaluwas sa pagpamomba.
Sa interbyu sang Bombo Radyo Koronadal kay Gng. Felipa Regidor, 64 anyos kag tag-iya sang karinderya malapit sa ginpasigabungan nga lying-in sa Crossing Makar, nagpadulong pa sa ila nga karinderya ang mga suspek apang wala na sini matalupangdan nga may ginbilin ang mga ini bangud masako suno pa ini sa ila mga customers pasado alas 11 sang udto.
Pila ka minuto pa ang naglabay kag ginkakibot nila ang tuman ka baskog nga pagsigabong kun sa diin nakit-an na lamang sini nga duguan na ang iya nga duha ka tiil, naga aso na ang palibot kag nagpanic ang mga tawo kun sa diin gilayon sya nga gindangat sa balay bululngan kaupod ang iban pa nga mga biktima samtang karun sa hapon igapaidalom naman ini sa minor operation bangud nagapabilin sa gihapon sa mga tiil sini ang shrapnels.
Kaangot sini, ginpahayag ni PSupt. Aldrin Gonzales, ang tagpamaba sang PNP regional office 12 nga gindihon na ang Special Investigation Task Group (SITG) Bonita agud magtutok sa insidente kag ginahibalo pa ang koneksyon sang mga asud-asod nga pagpasigabong sa Isulan mangin man sa Midsayap, North Cotabato kagab-i sa nagluntad nga pagsigabong sa Gensan kun sa diin grupo sang ISIS inspired group nga Bangsamoro Islamic Freedom Fighters ang isa sa mga grupo nga ginatudlo nga yara sa likod sini.
