KORONADAL CITY- Nagakasubo subong ang boyfriend sang isa sa mga napatay sa panibagg-o nga bombing incident sa Kalawag 2 sa banwa sa Isulan, Sultan Kudarat bangud indi ini makapati sa pagkadula sang iya nobya nga si Marialyn Luda, 15 anyos nga halin sa Biwang, Bagumbayan, Sultan Kudarat.
Sa ekslusibo nga interbyu sang Bombo Radyo Koronadal kay Kenneth nga nagpadulong lang sa internet shop ang nobya agud nga updan ang pakaisa sini nga si Jun Mark Luda, 18 anyos nga napatay man sa bombing.
Samtang sa pihak nga bahin, baganihan kun kabigon sang iya mga kabarkada si Rem John Opillo, 17 anyos nga residente sang Brgy. Dansuli, Isulan, Sultan Kudarat makaligad sini nga isalbar ang pila sa iya mga abyan nga gin-igo man sang shrapnels sa pagsigabong sang Improvised Explosive Device.
Dugang pa ni Opillo nga sang nagsigabong ang IED, nag-collapse man ang internet shop kun sa diin sa baylo nga magdalagan palayo sa blast site, ginbalikan sini ang iya abyan nga pilason kag ginhakwat padulong sa mas luwas nga lugar.
Sa karun apisar yara pa sa estado sang trauma, ginapilit nila nga makarekover sa nagluntad nga insidente nga ginkapatay sang 2 ka persona kag ginkapilas sang 13 ka iban pa.
