KORONADAL CITY – Bastante ang suplay sang karne sang baboy apang may pagmahal sang presyo. Ini ang nangin pahayag ni Dr. Charlemaigne S. Calo, City Veterinary Officer sang Koronadal sa interbyu sang Bombo Radyo Koronadal.
Suno sa iya, wala sang problema sang suplay sang karne, apang ginasiguro sa gihapon sang ila nga talatapan kung diin ini halin ang nasambit nga mga karne. Nahibaluan nga yara sa gihapon sa Pink Zone ang siyudad kag wala sa gihapon nagakumpyansa ang opisyal bangud indi na luyag sini nga magabalik na naman ang siyudad sa Red Zone.
Suno sa iya, nagaagi sa gihapon sa nagakaigo nga dokumento kag proseso ang pagdeliver, pag-ihaw o kun pagletson sang baboy. Sa karon, nagadahom na ang opisyal nga magabalhin na sa Green Zone o ASF Free ang siyudad agud nga tayuyon nga makapanumbalik ang mga Hog raisers sa pag-alaga sang baboy.
