Limitado na ang suplay sang pila ka mga gulay sa mga grocery store sa Kuwait samtang nagsaka man ang presyo sang pila ka sahi sang karne bangud sa padayon nga tensyon sa rehiyon.
Ini ang nangin pahayag ni Girlie Compas Bragado, Bombo International News Correspondent sa Kuwait, sa interview sang Bombo Radyo Koronadal.
Suno kay Bragado, padayon ang kahadlok nga nabatyagan nila sa kada adlaw, ilabi na sa tion nga makabati sila sang mga paglupok bangud indi nila mahibaluan kun sa diin magtupa ang mga missiles.
Gindugang pa niya nga may mga datos man sang pag-target sa pila ka mga bangko, airport, fuel tanks kag pila ka residential areas sa Kuwait, nga nagadugang sang paglala sang sitwasyon sa pungsod.
Samtang, ginpahayag man ni Bragado nga luwas sa boluntaryo nga repatriation nga ginapatuman sang gobyerno sang Pilipinas, wala pa sila sang iban nga nabaton nga bulig, ilabi na sa pinansyal nga aspeto.
Sa pihak nga bahin, ginpabutyag man niya nga may pila na ka mga lugar sa Kuwait nga naga-amat-amat sang kakulangan sa suplay sang tubig kag kuryente bangud sa padayon nga kinagamo sa rehiyon.
Bangud sini, nagpanawagan si Bragado sa gobyerno sang Pilipinas nga magpatuman sang bastante nga programa kag suporta sa mga magpauli nga mga OFWs bangud suno sa iya, indi madali nga desisyon ang magpauli sa pungsod wala sang bastante nga bulig kag suporta halin sa gobyerno.
