Nagpapatuloy ngayon ang malalimang imbestigasyon ng mga otoridad upang matukoy ang motibo at matunton ang tinatayang sampung armadong kalalakihan na responsable sa madugong pananambang sa convoy ng militar sa Barangay Lamin, Malabang, Lanao del Sur.
Kasabay nito ang panawagan ng hustisya mula sa mga naulilang pamilya para sa mga biktima, habang mariing kinondena ng buong komunidad ang walang saysay na karahasan na kumitil sa buhay ng mga nagsisilbi sa bayan.
Nabatid na pauwi na sana sa kanilang kampo ang mga sundalo matapos magsagawa ng area security operation sa Barangay Baraas nang bigla na lamang silang pinagbabaril ng mga suspek bandang alas-5:00 ng hapon noong Sabado, June 27.
Sa inilabas na impormasyon ng mga otoridad, kinilala ang nasawing sundalo na si Corporal Jayson Castro, miyembro ng Philippine Army at residente ng Molave, Zamboanga del Sur, habang sugatan naman ang drayber ng sasakyan na agad dinala sa pagamutan.
Masakit namang nadamay at idineklara ring dead on arrival ang isang sibilyan na kinilalang si Hapipa Saripada Macadato, 23-anyos. Si Macadato ay isang lisensyadong guro at volunteer teacher ng Ministry of Basic, Higher and Technical Education (MBHTE-BARMM).
Lumabas sa pagsisiyasat na walang kinalaman sa operasyon ang dalaga at nagkataon lamang na pauwi na ito sakay ng isang payong-payong nang tamaan ng ligaw na bala sa likod ng kanyang ulo sa gitna ng palitan ng putok.
Samantala, maswerte namang nakaligtas at walang galos ang limang miyembro ng Civilian Armed Force Geographical Unit Active Auxiliary (CAFGU-CAA) na kasama rin sa naturang convoy.
Sa ngayon, nagpapatuloy ang manhunt operation ng militar at pulisya laban sa mga salarin upang tiyaking mapapanagot ang mga may sala at makamit ang hinahangad na katarungan ng mga biktima.
