KORONADAL CITY – Yara na sa kustodiya sang mga otoridad ang isa ka sultiro nga most wanted sa banwa sang Lebak, Sultan Kudarat kag may kaso nga “acts of lasciviousness”, matapos nga maaresto sang mga otoridad.
Ginkilala ni PLt.Col. William Facsoy Jr. hepe sang Lebak MPS ang naaresto nga si alyas “Kejie” , 19-anyos nga residente sang Barangay Purikay, Lebak, Sultan Kudarat.
Suno kay Facsoy, naaresto ang suspek sa puluy-an sini sang mga otoridad gikan sa Lebak MPS, CIDG 12, Regional Intelligence Division 12 Tracker Team Delta, 2nd Sultan Kudarat Provincial Mobile Force Company, Sultan Kudarat Maritime Police Station kag Regional Maritime Unit 12.
Ginserbe sang mga ini ang warrant of arrest para sa kaso nga acts of lasciviousness nga may gin-rekomendar nga piyansa nga nagalab-ot sa PHP 200,000.
Kaangot sini, ginpasiguro sang opisyal nga magapadayon sila sa paglagas kag pag-aresto sa mga indibidwal nga may salabton sa layi.
