KORONADAL CITY – Liwat nga ginbatak sa General Community Quarantine (GCQ) ang bug-os nga probinsya sang Sultan Kudarat makaligad ang napagkit nga kaso sang local transmission sang covid-19.
Sandig ini sa ginpaguwa nga executive order no. 46 ni Sultan Kudarat Governor Suharto “Teng” Mangudadatu kasunod sang pagkapatay sang 61 anyos nga manunudlo nga taga-Isulan sa nasambit nga balatian kun sa diin nagpositibo man diri ang duha ka bata sini nga frontliner kag ang iya nga bana.
Kaangot sini, gindugang man ni Tacurong City Information Officer Allan Freno sa interbyu sang Bombo Radyo Koronadal nga ginbutang sa enhanced community quarantine (ECQ) ang Prk. Maligaya sa Brgy. Kalawag 1, Prk Pag-asa kag Datukan Compound sa Brgy. Kalawag 2, kag Prk. Adarna sa Brgy. Sampao.
Suno kay Freno, tanan nga mga pagsulondan nga ginpatuman sadtong GCQ ang liwat nga ibalik kasubong sang curfew nga magaumpisa alas 7 sa gab-i tubtob alas 4 sa aga; paglimita sa pagsakay sang mga pasahero sa public transportation; pagpatuman sang no movement day kada Dominggo kag iban pa.
Dugang ni Freno, magadugay suno pa ini tubtob sa Agosto 31, 2020.
