KORONADAL CITY – Nagdangat sa Bombo Radyo Koronadal ang isa ka concerned citizen sa probinsya sang Sultan Kudarat angot sa nagakatabo nga isyu sa Sultan Kudarat Provincial Jail.
Suno kay alyas Mameng, kinahanglan suno pa nga ipaagi sa isa ka kooperatiba nga ginapadalagan sang mga jailguards ang tanan nila nga dala para kuntani sa mga preso, kag utay-utay man suno pa ang paghatag nila sang kwarta kun sa diin iban sa ila ang ginatago pa para suno pa sa ila palaabuton nga Christmas party.
Magluwas diri, ginareklamo man sini ang tuman kamahal nga mga presyo sang mga balaklon nga yara mismo sa nasambit nga kooperatiba.
Dugang ni alyas Mameng, tuman man ka makaluluoy ang iban nga mga preso didto nga ginadaog-daog sang iban bangud sa isyu sang pagpangutang, rason nga nagakabalaka sila sa kahimtangan sang ila mga kakilala ukon miyembro sang pamilya didto tuga sa nasambit nga balita.
Tubtob sa subong ginatinguhaan sang Bombo Radyo nga makaestablishar sang contact kay Provincial Jail Warden Marlon Robles agud makapaathag ini sang iya nga bahin angot sa amo nga isyu.
