KORONADAL CITY- Gina-imbestigaran sa karun ang gina-alegar nga pagmaoy kag pagpangtaya sang armas sang isa ka suldado sa Maguindanao Provincial Hospital sa Shariff Aguak Maguindanao.
Sa impormasyon nga ginpalab-ot ni Dr. Coco Digal, hubog suno pa nga nagsulod sa ospital ang isa ka nagpakilala nga PFC Gallego kun sa diin isa ini sa mga nagdala sang isa ka bata nga yara sa estado sang emerhensya.
Wala suno pa gilayon naatipan ang pasyente nga ila gindala bangud sa kakulangan sa doktor rason nga nagpanghangkat ini kag ginpaandaman si Dr. Digal nga pagapatyon kag gintayaan suno pa sang armas.
Kaangot sini ginkontra naman sang iloy sang bata nga gindangat sang suldado sa ospital ang akusasyon ni Dr. Digal kag ginsiling nga wala suno pa nagmaoy ang suldado kag naakig lang bangud sa mahinay nga pagresponder sang pamunuan sang ospital kun sa diin sa pagkamatuod, dako suno pa ang pagpasalamat nila kay PFC Gallego sa pagbulig sa ila agud madala sa ospital ang iya bata nga yara sa kritikal nga kondisyon.
Samtang suno naman kay Lt. Col. Gerry Besana, commanding officer sang Civil Military Operations (CMO) sang Army’s 6th Infantry Division (ID) kag spokesman sang Joint Task Force (JTF) Central, gina-imbestigaran pa nila ang nasambit nga panghitabo kag nagapakig-angot na sa IPHO Maguindanao kaangot sa insidente nga ginakaulamiran sang ila suldad kag sa tion nga mapamatud-an nga guilty ini, indi nila iga tolerate ang insidente.
