KORONADAL CITY – Ginalauman na suno pa sa isa ka lider nga sa pag-abot sang State of the Nation Address sini, igapalayag niya ang mga”strength kag accomplishments” sa sulod sang pila ka tuig na nga pagpangalagad sini.
Ini ang ginpahayag ni Mayor Eliordo U. Ogena, sa interview sang Bombo Radyo Koronadal angot sa kun ano ang gina-ekspektar sini nga mabatian sa ikatatlo nga State of the Nation Address (SONA) ni Pangulong Ferdinand Marcos Jr.
Suno kay Mayor Ogena, sigurado ini nga igahan-ay ni Pangulong Marcos ang nahimo na sini sa nagkalain-lain nga problema sa pungsod labi na sa ekonomiya, agrikultura, edukasyon, kag madamo nga iban pa.
Luyag man suno pa niya mabatian ang ginahimo nga tikang sang gobyerno angot sa mga kalamidad kun diin bag-o lang natapos nag el nino kag nagasugod naman sa paghalit ang La Nina.
