Ginpahayag ang state of emergency sa British Columbia, Canada, matapos maglapta sang madali ang Bald Range wildfire kag nagpaguwa sa ila mga puluy-an ang masobra 20,000 ka indibidwal.
Suno sa BC Wildfire Service, naglapta na ang sunog sa masobra 103 square kilometers sa Summerland, Peachland kag iban pa nga mga distrito sa British Columbia.
May mga puluy-an kag properties nga naguba sang kalayo, samtang may pila ka residente nga na-trap bangud sa madasig nga pagbag-o sang sitwasyon kag kinahanglan pa nga salbaron.
Suno kay British Columbia Premier David Eby, tuman kataas ang kalayo nga nakahimo pa ini sang kaugalingon nga weather system kag nagpatuga sang kilat.
Bangud sa state of emergency, makagamit ang provincial government sang dugang nga gahum para sa travel restrictions, suplay sang kinahanglanon kag pagkoordinar sang rescue operations.
Ginpabalhin man sa mas luwas nga lugar ang ginatos ka residente sang mga care facility, lakip ang mga senior housing.
Sa karon, nagpagwa man sang evacuation orders kag alerts ang mga karatig nga distrito bangud sa nagapadayon nga peligro sang sunog.
