Natalana nga magpagwa ang gobyerno sang department order nga nagatuyo nga kakason ang suggested retail price ukon SRP sa basic goods kag prime commodities.
Suno kay Department of Trade and Industry Assistant Secretary Agaton Uvero, ginapreparar sang ahensya ang department order nga magailis sang SRP system sa price range system sa basic kag prime goods.
May ginatos ka basic goods nga may ginasunod nga SRP nga gintalana sang manufacturers kag regular nga gina-monitor sang gobyerno. Halimbawa sini ang pila ka barato nga mga brands sang sardinas, instant noodles, kag bisan sang pinoy tasty kag Pinoy pandesal.
Suno kay Uvero, nga kon basehan ang maragtas, mas estable ang mga presyo sang manufactured goods kon ikumparar sa agricultural items kaangay sang bugas, karne, kag mga utan.
Sang ginpamangkot kon ano ang matabo kon madula na ang SRP kag magtaas ang mga presyo sang mga balaklon, nagsabat si Uvero nga mahimo gihapon nga ibalik sang gobyerno ang SRP kon abusuhon sang mga manufacturers ang bag-o nga system.
