KORONADAL CITY – Nagdihon na ang PNP-12 sang isa ka task group upang imbestigahan ang nagluntad nga pagpamomba sa Cotabato City sadtong bisperas sang bag-ong tuig.
Sa interbyu sang Bombo Radyo Koronadal kay PSupt. Aldrin Gonzales, spokesman sang PNP-12, ginmando ni Regional Director CSupt. Eliseo Rasco ang pagdihon sang Special Investigation Task Group Southseas agud tutukan ang nasambit nga pagpamomba.
Gin-ako man sang opisyal nga wala pa sila sang lead kun sin-o ang mga grupo nga responsible sa pagpamomba apang nagapati siya nga indi ini kahimoan sang isa lamang ka grupo.
Una na nga ginpahayag sang Philippine Army nga Dawlah Islamiyah kag Bangsamoro Islamic Freedom Fighters (BIFF) ang posible nga yara sa likod diri.
Madumdoman nga duha ang napagkit nga patay kag 32 naman ang pilason sa pagsigabong sang IED sa atubangan sang South Seas mall sa Magallanes St, Cotabato City sadtong Disyembre 31 sang hapon.
