KORONADAL CITY- Gina-istoryahan karun sa bug-os nga rehiyon 12 ang special project suno pa ni Pres. Rodrigo Duterte nga Pagbabago at Karapatan ng Women Power Mindanao Inc. nga ginareklamo bangud sa peke suno pa ini kag nagapangolekta sang kwarta sa ila mga ginarecruit.
Nahibaluan nga ang nasambit nga grupo ang nakarecruit na sang nilibo katawo halin sa probinsya sang South Cotabato, Sultan Kudarat, Maguindanao, North Cotabato mangin man sa Sarangani Province kun sa diin kada myembro sini ang ginasukot sang P70.00 bilang membership fee.
Sa ginapalibot nga sulat nga naghalin suno pa sa Office of the President, nakabutang ang pangalan sang mga lider sang grupo nga ginmanduan suno pa ni Pres. Duterte nga magpangrecruit nga sanday Bishop Claro Luquias Jr kag isa ka MGen Joel Pereyra Famoso sang Armed Forces of the Philippines.
Samtang sa interbyu sang Bombo Radyo Koronadal kay AFP public affairs office chief Lt. Col. Emmanuel Garcia wala suno pa sang myembro sang Armed Forces of the Philippines nga nagapangalan nga MGen Joel Pereyra Famoso retirado ma ukon aktibo rason nga iya ginpaandaman ang mga pumuluyo nga hibaluon sang maayo kag imbestigaran kun lehitimo bala ukon indi ang nasambit nga grupo agud malikawan nga mabiktima sang scam.
