KORONADAL CITY-Dalayon na nga nag dihon sang Special Investigation Task Group (SITG) ang Police Regional Office 12 makaligad ang nagluntad nga pagpasigabong sang IED sa isa ka unit sang Mindanao Star bus sa national highway nga sakop sang Upper San Mateo Aleosan, North Cotabato nga ginkapilas sang 6 ka sibilyan ka ginkapatay sang isa ka 5 anyos nga biktima.
Ini ang nangin pahayag ni PEMS Randy Hampac, tagpamaba sang Aleosan PNP sa ekslusibo nga pagpakighinun-anon sang Bombo Radyo Koronadal. Suno sa opisyal, indi pa sa gihapon matumod sa subong ang sahi sang improvised explosive device (IED) nga naglupok sa nalikod nga bahin sang bus nga may body number 1551 kag ginamaneho ni Michael Sochaysing Hubabib, 36 anyos kag residente sang Matina, Davao City.
Dugang pa sang opisyal, isa ka unidentified suspect ang nagdala sang bagahe kag nagsaka sa bus sa Kabacan, Cotabato Province apang nanaog man ini sang nag abot sa Pikit, North Cotabato. Wala naman ginakakas sang mga kapulisan ang anggulo sang extortion sa paghitabo kag ginahibalo pa kun kay sin-o nga signature ang naglupok nga bomba.
Sa subong yara na sa luwas nga kahamtangan sa Aleosan District Hospital kag Cotabato Regional Medical Center ang 6 sa 7 ka mga pilason lakip na ang 5 ka bulan nga lapsag apang ginbawian na sang kabuhi ang 5 ka tuig nga bata nga biktima nga nautdan gid sang tiil.
Hugot naman nga checkoint ang ginpatuman sa subong sa bilog nga Rehiyon Dose agud nga malikawan ang mga atrosidad nga tuga sang mga lawless elements.
