Bukas si Bojie Dy III nga amyendahan ang layi agud mapanubo ang buwis sa gatong.
Ini nga sabat nagsunod sa pahayag ni President Ferdinand Marcos Jr. nga plano niya nga makigpulong ang liderato sang Kamara kag Senado agud talakayon ang paghatag sa iya sang gahum nga mapanubo ang buwis sa gatong.
Tumong sini nga maproteheran ang pumuluyo batok sa epekto sang pagsaka sang presyo sang gatong sa global nga merkado.
Suno kay Dy, kun magsobra sa 80 dolyar kada bariles ang presyo sang Dubai crude, sigurado nga mabatyagan ini sa pamasahe, presyo sang pagkaon, kag iban pa nga nagapanguna nga baraklon.
Bangud sini, bukas ang Kamara nga makig-koordinar sa Senado para amyendahan ang layi agud mahatagan ang Presidente sang gahum nga mapanubo ang excise tax sa tion sang nagalala nga pagsaka sang presyo sang gatong.
Suportado man ni Dy ang panawagan sa mga ahensya sang gobyerno nga magpatuman sang mga tikang sa pagtipig sang kuryente bangud sa nagapadayon nga tensyon sa Middle East.
