KORONADAL CITY – Ginpasiguro na sang South Cotabato PNP nga ginatutokan na nila ang pagpamahog sa kabuhi batok kay Tampakan, South Cotabato Mayor Leonard Escobillo.
Ginpahayag ni South Cotabato PNP Provincial Director Police Colonel Jimuel Siason nga nakahanda sila nga magbulig sa local forces sa nasambit nga banwa agud masiguro ang kaluwasan sang nasambit nga alkalde.
Dugang pa sang provincial director, madamo sila sang mga ginalantaw nga mga anggulo kaangot sa nasambit nga pagpamahog apang wala man nila ginapaiway nga posible nga NPA ang may kahimoan sang sini nga pagpamahog.
Madumdoman nga ginpahibalo sa iya sang ginaaligar nga mga katapo sang Guerilla Front Far South Mindanao Region nga ginpahamtangan siya sang silot nga kamatayon bangud sa suno pa paglapas sa tawhanong kinamatarong, pagkuha sa duta sang mga katutubo kag iban suno pa nga mga krimen.
Apang nagpanindugan si Mayor Escobillo nga magapabilin ang pagserbisyo sini sa iya nasakupan sa pihak sang pamahog sa iya kabuhi.
