KORONADAL CITY- Yara sa high risk sang malapnagon nga balatian nga ASF ang probinsya sang South Cotabato, makaligad nga madamo sang banwa kag lugar ang apektado sang nasambit nga virus.
Ini ang kumpirmasyon ni Dok. Flora Bigot, Provincial Veterinarian sa interbyu sang Bombo Radyo Koronadal.
Suno sa iya, bangud sa sini nga panghilitabo duha na ka mga kabanwahanan ang ginpaidalom sa Red Zone nga amo naman ang Banwa sang Banga kag Surallah.
Sa sini nga bahin, ginadumilian sa mga backyard hog raisers ang pagpaguwa sang baboy padulong naman sa iban nga lugar o kun banwa.
Kinahanglan man sang mga ini nga ipatest ang ila nga baboy sa ASF antes nga iyawon sa slaughters kag tuman nga ginapahugtan kag ginadumilian ang pag ihaw sa mga balay ang mga nasambit nga baboy.
Samtang pito naman ka mga banwa ang ginbutang sa pink zone, amo ang Lake Sebu, Norala, Sto.Niño, Tantangan, Koronadal, Tupi kag T’Boli.
Sa sini naman nga bahin suno kay Dok Bigot, ang mataas ang risgo nga masudlan sang nasambit nga Virus.
Suno pa diri, pwede makasulod ang mga baboy apang sa kapareho niya lamang nga pink zone areas.
Nagapabilin naman sa green zone kag luwas sa ASF ang banwa sang Tampakan kag Polomolok.
Sa karon, nagpasiguro naman ang ila nga talatapan nga magahatag sang ayuda sa tanan nga apektado apang wala pa sang insakto nga balor kung pila ang igahatag.
Gindugang pa sang opisyal, nga kung mahimo paga istriktuhan gid sang tagsa ka mga banwa ang ila nga boarder agud wala sang may makasulod nga nga karne nga mangin tunaan sang ASF.
