Kinahanglan nga busisaon kung may yara pa ba sang dapat nga ihibalo sa tanan nga mga butang antes nga magapirma sa isa ka documento. Ini ang ginpaklaro ni Atty. Antonio Bendita, ang bise alkalde sa banwa sang Surallah, South Cotabato sa interbyu sang Bombo Radyo Koronadal.
Suno pa sa iya, pabor siya sa Charter Change pinaagi sa People’s Initiative. Dugang pa niya nga kinahanglan gid man may yara sang pag bag-o sa konstitusyon ilabi na may kaangtangan sa ekonomiya agud nga makab-ot ang ginahandom nga pag-umwad.
Apang ginpahayag sini nga madako nga problema ang pamaagi ukon proseso nga ginahimo sa signature campaign kung sa diin ginatagtagan sang kwarta ang mga tao para lamang magpirma, ginapromisahan sang ayuda kag iban pa nga mga bulig. Gindugang pa sang opisyal nga may yara sang mga panghilitabo kung sa diin ang iban ginahadlok, hindi boluntaryo kag nagapirma nga wala nakaintindi sa ila sini nga gina-pirmahan.
Samtang, may nadawat naman nga mga pipila ka reklamo halin sa iban nga mga Job order employees sang local government unit sang Surallah kung sa diin gina pilit suno pa sila nga magpirma sa baylo sang ila nga trabaho.
Sa karon nagapanawagan ang opisyal sang South Cotabato nga mag obserbar kag hindi magpadala-dala sa ano man nga promisa baylo sa ila sini nga pirma.
