KORONADAL CITY – Posible nga ipaidalom sa state of calamity ang probinsya sang South Cotabato bangud sa padayon nga pagsaka sang kaso sang dengue.
Ini makaligad napagkit sa 135% ang pagsaka sang kaso sang balatian, mas mataas kumpara sadtong nakaligad nga tuig.
Ginpahayag ni OIC provincial health officer Dr. Alah Baby Vingno, nga base sa datos sang Provincial Epidemiology Surveillance Unit (PESU) sadtong Enero tubtob Hulyo 6, 2019 nakapagkit na sang 16 ka casualties kun sa diin tatlo diri sa bahin sang Surallah samtang tig-duha sa mga banwa sang T’boli, Sto Nino, Polomolok, Banga, kag siyudad sang Koronadal.
Magluwas sini, padayon man nga ginatutokan ang mga banwa sang Sto Nino, Tantangan, Surallah, Tampakan, Norala kag Banga bangud sa nagasaka nga kaso sang balatian.
Base sa general rule sang talatapan, mahimo madeklarar ang state of calamity sa probinsya kun masobra duha ka banwa ang nakaangkon sang outbreak.
Gani naglaygay ang opisyal nga pahugtan ang Search and Destroy method sa mga breeding sites kag ang pagpatigayon sang fogging sa mga natumod nga mga hotspots.
