KORONADAL CITY – Naghingyo sang pasaylo ang police provincial director sang South Cotabato sa ginpakita nga batasan sang mga police officers sang probinsiya.
Ini makaligad nga nagpamalibad nga maghatag sang impormasyon sa natabo nga shooting incident sa Bombo Radyo Koronadal ang Polomolok PNP kag ginpahayag nga pakadtuon ang mga reporters sa police station agud nga makakuha sang balita.
Sa interbyu sang Bombo Radyo Koronadal kay South Cotabato Police Provincial Director Police Senior Superintendent Nestor Salcedo dapat suno pa nga nahibaluan sang mga pulis ang protocol sa tion nga magpatigayon sang interview ang mga katapu sang media.
Suno kay Salcedo, indi na kinahanglan nga magpadulong sa police stations ang mga katapu sang media kun mahimo man nga makasabat paagi sa telepono ang on duty nga police officer kag may natabo nga insidente o krimen.
Kaangot sini, nagpromisa si Salcedo nga hambalan ang mga pulis sa Polomolok PNP labi na ang chief of police, imbestigador kag desk officer didto.
Madumduman nga sang Sabado pa natabo ang shooting incident sa banwa sang Polomolok apang tubtob subong wala pa nakasumiter sang report sa provincial command ang kapulisan didto.
Aminado naman si Salcedo nga indi na dapat palampason ang serye sang shooting incident sa nasambit nga banwa bangud kinahanglan naman nga madakpan ukon maarestar ang organized criminal group nga nagapatigayon sang operasyon sa nasambit nga lugar.
