Ginaduso ni Senador Sherwin Gatchalian ang isa ka hagna nga magadumili sa mga kabataan nga wala pa sang 16 anyos nga mag-usar sang social media sa Pilipinas.
Sa idalom sang Senate Bill No. 2066 ukon Social Media Safety for Children Act, ginabawal ang pagrehistro, pag-access, kag pagpanubo sang account sang mga menor de edad sa bisan ano nga social media platform.
Tinutuyo sang hagna nga protekteheran ang mga kabataan batok sa posible nga peligro sa digital nga kalibutan, lakip na ang epekto sini sa ila mental, moral, kag sosyal nga kahimtangan bangud sa sobra nga pag-usar sang social media.
Suno kay Gatchalian, kinahanglan ang mas komprehensibo nga regulasyon bangud ang kasamtangan nga mga layi nagapokus lamang sa silot kag indi sa aktibo nga pagproteher sa online exposure sang mga menor de edad.
Sa idalom man sang hagna, obligasyon sang mga social media companies nga magpatuman sang hugot nga age verification systems pareho sang ID authentication, facial recognition, ukon iban pa nga teknolohiya.
Kinahanglan man nila maghimo sang regular nga audit agud matumod kag ma-deactivate ang mga account sang mga menor de edad.
Ang Department of Information and Communications Technology (DICT) amo ang mangin responsable sa pagbantay kag pagpatuman sang sini nga mga tikang.
Kun mangin layi ini, mahimo pagmultahon ang mga social media companies sang P1 milyon tubtob P10 milyon sa kada paglapas, kag dugang nga P100 kada adlaw samtang nagapadayon ang paglapas.
