Ginpakamalaot sang singer nga si Katy Perry ang paggamit sang White House sang iya kanta.
Sa iya social media, ginpahayag niya ang iya pagkadismaya matapos gamiton ang iya kanta nga “Firework” sa missile attack sang White House batok sa Iran.
Suno kay Perry, wala niya gin-aprubahan ang amo nga paggamit sang iya kanta kag ginakondenar niya ang ginhimo sang White House.
Ginpahayag man sang singer nga ang kanta yara para sa paglaum, pag-ayo, kag pagpakusog sang kabuhi sang isa ka tawo bisan pa nagaagi ini sa ano man nga mga pagtilaw.
Dugang pa niya, indi husto nga gamiton ang iya kanta agud magsuporta sang kinagamo nga mahimo magresulta sa pagkabahin-bahin sang mga tawo.
Madumduman nga indi lang si Perry ang nagpahayag sang iya kasubo, bangud pati man ang singer nga si Kesha nagreklamo matapos gamiton sang White House ang iya kanta nga “Blow” agud ipakita ang ila pagpang-atake batok sa Iran.
Sang nagligad nga tuig, ang singer nga si Sabrina Carpenter nagsaway man sa US Government matapos gamiton ang iya kanta nga “Juno” sa kampanya sang Estados Unidos batok sa mga immigrants.
