KORONADAL CITY – Ginkilala sang Simbahang Katolika kag sang nagkalain-lain nga mga institusyon ang Bombo Radyo Koronadal bangud sa paghatag sang mga libre nga bulong para sa tuman nga nagapanginahanglan sini.
Kalakip sa mga nangin benepisaryo sang nasambit nga mga bulong sa extended nga bulig sang Bombo Medico amo ang Social Action Center sang Diocese of Marbel, Sagrada Familia Parish, South Cotabato Provincial Rehabilitation and Detention Center, kag ang St. Lawrence Kalinga Foundation Inc.
Sa interbyu sang Bombo Radyo Koronadal kay Social Action Center director Fr. Jerome Millan, dako ang nakontribwer sang Bombo para sa mga kasimanwa naton nga indi makabakal sang bulong bangud sa mahal nga presyo sini.
Suno naman kay South Cotabato Provincial Jail Warden Felicito Gumapac, tuman nga ginkalipay sang mga inmates ang nasambit nga inisyatibo sang Bombo ilabi na nga sa masobra 1,000 nga nakapreso didto, 20 porsyento diri ang may balatian kag nagapanginahanglan sang bulong kag bitamina.
Ginpasalamatan man ni PEC President Eleonor Rahman sang Sagrada Familia Parish ang mga programa sang Bombo Radyo bangud sa luyag sini nga magbulig sa mga kautoran naton nga may balatian, samtang ginkalipay man sang mga bata sa St. Lawrence Orphanage ang pag-abot sang nasambit nga mga bulong.
Ang Bombo Medico isa lamang sa mga programa sang Bombo Radyo Philippines bilang kabahin sang corporate social responsibility ng network.
