KORONADAL CITY– Gin-awhag ni Father Angel Buenavidez ang nagatindog nga tigpamaba sang Diocese of Marbel pinaagi sa Bombo Radyo Koronadal ang mga biktima sang Kabus Padatuon investment scam nga magpalapit sa ila kun may ginadala nga mabug-at nga problema sa kabuhi.
Ini kadungan sang panawagan sang simbahan nga aksyunan ang makaalarma nga asud-asod nga insidente sang pagpakamatay sa probinsya sang South Cotabato kun sa diin pila dire ang may kaangtanan sa pagsarado sang KAPA.
Suno kay Father Angel, ang mga trahedya sang suicide ang dala sang tuman nga pressure sa palibot kasubong sang materyalismo.
Gin-awhag man sini ang mga KAPA members nga sa karon frustrated kag wala makahibalo sang ila himuon nga magpalapit sa simbahan agud mapakigbahin ang mga hibubun-ot kag kabug-at nga nabatyagan bangud handa ang kaparian nga magpamati kag maghatag sang laygay.
Gin-insister man sang simbahan nga indi solusyon ang paghikog sa problema kag sa baylo pangitaon ang positibo nga solusyon kag himuon ini nga pamaagi agud mas mapalapit sa Diyos kag mapapag-on ang pagtuo sa adlaw-adlaw nga pagpangabuhi.
