KORONADAL CITY – Ginkalipay sang Diocese of Marbel ang pagdesignar ni Pangulong Rodrigo Duterte kay General Roy Cimatu bilang bag-o nga tiglikom sang Department of Environment and Natural Resources (DENR).
Sa interbyu sang Bombo Radyo Koronadal kay Bishop Dinualdo Gutierrez sang Diocese of Marbel, malipayon siya nga si Cimatu ang napili ni Pangulong Duterte bangud magluwas sa personal niya ini nga kakilala, maayo suno pa ini nga tawo, masaligan, indi kurakot kag seryoso sa trabaho.
Apang, aminado siya nga indi tuma ka kwalipikado ang tiglikom pag-abot na sa track record sini sa environment apang dapat suno pa nga tagaan sang tsansa si Cimatu bangud isa sa pinakaimportante sa tanan nga committed ang isa ka opisyal nga tagaan sang importansiya kag ipangibabaw ang “common good”.
Nagpasalamat man si Bishop Gutierrez nga matagaan ligwa ni Cimatu ang pag-review sa mga existing policy sang ahensiya labi na mining industry.
Madumduman nga isa ang Diocese of Marbel sa hugot nga nagapamatok sa operasyon sang isa ka dako nga mining company sa probinsiya sang South Cotabato.
Samtang, wala man ginlipod sang Obispo nga nasubuan ini sa pag-reject sang CA kay anay Secretary Gina Lopez bangud very qualified kuntani ini sa posisyon.
Kadungan sini, nagpanawagan ang Obispo sa mga pumuluyo sa South Cotabato nga ipabilin ang pagproteher sa environment.
