KORONADAL CITY- Nagapadayon ang imbestigasyon sa karon sang mga otoridad sa nagluntad nga pagpanluthang-patay sa bahin sang National Highway sakop sang Purok Kauswagan,Brgy. Saravia , Syudad sang Koronadal.
Nga kung sa diin ginkilala ang biktima nga si Arnold Bacason, 47 anyos , kasado kag residente sang Purok Pag-Asa,Brgy. Carpenter Hill,Syudad sang Koronadal.
Sa interbyu sang Bombo Radyo Koronadal kay Nonoy Bacason, utod sang biktima, papauli na kun tani ang biktima upod ang iya nga asawa sakay sang ila single motor nga Baja halin Barangay Sarava, bangud diri naga ubra ang iya nga asawa sang hinali na lamang nga ginharanagn sila sang riding in tandem nga direksyon ang padulong sa Gensan kag ginluthang ang biktima.
Sang ini ang natumba na, nagpanaog pa ang isa sa mga suspek kag liwat nga ginpalukpan ang biktima nga nag agom sang igo sang bala sa iya nga ulo nga nangin tunaan sang iya dalayon nga kamatayon.
Indi pa man matumod sang pamilya kung ano ang motibo sa krimen bangud wala man daw sang pagpamahog nga nabaton ang iya nga utod antes pa man ang krimen kag wala man daw ini naimbolbar sa ano man nga mga bisyo.
Sa karon, hustisya naman ang singgitan sang pamilya agud matikma na ang mga responsable sa nasambit nga krimen.
