KORONADAL CITY – Ginbawian sang kabuhi ang isa ka senior citizen sa nagluntad nga aksidente sa dalanon sa siyudad sang Koronadal.
Ginkilala ni Police Staff Master Sergeant Gandy Basan, Traffic Investigator sang Koronadal City PNP ang biktima nga si Rey Quibete, 64-anyos, kag residente sang Barangay GPS, Koronadal City.
Suno kay Basan, ginamaneho ni Quibete ang motorsiklo sini sang mabunggo sa isa pa ka motorsiklo nga ginamaneho ni Arnel Tenorio, 44-anyos nga residente naman sang Barangay Cacub, Koronadal City.
Bangud sa kabaskog sang pagbungguanay sang duha ka motor nagtabog sa pihak nga lane sang dalan ang biktima kun diin nabungguan ini sang tricycle nga ginamaneho naman ni Nasser Manibpel, 30-anyos, nga residente sang Lutayan, Sultan Kudarat.
Nadala pa sa hospital si Quibete apang bangud sa malala nga pilas nga naangkon sini ginbawian ini sang kabuhi.
Sa karon, yara sa kustodiya sang traffic section sang mga involbado nga salakyan samtang nagapadayon ang imbetigasyon sa natabo.
Nahibaluan nga nagluntad nag aksidente pasado-alas 6:00 sang gab-i, Oktubre 24, 2024.
