KORONADAL CITY – Ginbawian sang kabuhi ang isa ka Senior Citizen matapos maiptan sang pison samtang nagaagi sa pedestrian sa Barangay Cuyapo, Tantangan, South Cotabato, pasado alas-9 sang aga, adlaw nga Sabado, Disyembre 6, 2025.
Ini ang ginkumpirmar ni PMaj Romeo Albano Jr., hepe ng Tantangan Municipal Police Station sa interview sang Bombo Radyo Koronadal.
Ginkilala ang biktima nga si alyas Inday, 60 anyos, residente sang nasambit nga barangay samtang ginkilala naman ang driver sang pison kay Jhon Loyd Cunogon, 26 anyos nga taga banwa sang Banga, South Cotabato.
Suno sa bayaw sang biktima nga si Carlos Nono, halin sa simbahan ang biktima apang nagbalik ini sa ila panimalay bangud nabilin sini ang iya nga cellphone.
Pag-abot sa highway, magatabok pa kuntani sa pedestrian ang biktima apang didto na natabo ang aksidente kun sa diin aksidente ini nga naiptan sang nagapadulong nga Pison sang makaduha ka beses.
Nahibaluan nga may gina kay-o nga bahin sang dalan sa nasambit nga lugar rason nga naga-operar didto ang pison nga nakaipit sa biktima.
Sa karon,ang patay nga lawas sang biktima ang nahaya sa St.Peter sa siyudad sang Tacurong samtang ang driver sang pison ang nagapabilin sa kustodiya sang Tantangan Municipal Police Station para sa dugang nga imbestigasyon.
