KORONADAL CITY – Ginbawian sang kabuhi ang isa ka senior citizen samtang pilason naman ang duha ka iban pa matapos nga magbungguanay ang duha ka motorsiklo sa national highway, Barangay Saravia, Koronadal City.
Suno kay Traffic Section Investigator PSSgt. Fely Bascon, isa ka 24 anyos ang nagamaneho sang Yamaha XMAX motorcycle sini padulong sa General Santos City sakay ang iya pasahero sang hinali nga matabok kuntani padulong sa pihak nga lane ang senior citizen nga nagamaneho man sang motorsiklo sini.
Bangud sa kabaskog sang impact nagtabog ang biktima sa pihak nga lane nga gintunaan sang pagkabangga sa iya sang isa ka salakyan.
Gilayon pa nga nadala sa hospital si Paches apang, gindeklarar na ini nga patay.
Samtan,ginbulong naman ang duha pa ka biktima nga driver sang XMAX kag angkas sini matapos mapilasan sa aksidente.
Padayon naman ang pahanumdom sang mga otoridad nga masami nga maghalong sa pagmaneho agud malikawan ang aksidente sa dalanon.
