KORONADAL CITY- Ginpa-athag sang pamunuan sang political party ni Pangulong Rodrigo Duterte nga PDP-Laban nga miyembro sa gihapon sang ila nga partido sanday anay Senate President Koko Pimentel kag ousted House Speaker Pantaleon Alvarez.
Ini ang ginpahayag ni Atty. Rogelio Garcia, ang bag-o nga national president sang PDP Laban sa eksklusibo nga interbyu sang Bombo Radyo Koronadal.
Suno kay Atty. Garcia, wala ginapahalin sa partido sanday Pimentel kag Alvarez apang ginkakas lamang sila bilang mga opisyal kag sa karon ordinary members na lamang.
Ginpa-athag ni Garcia nag nag-ugat ang reklamo sa pagpabaya ni Pimentel sa luyag sang mga ordinaryo nga miyembro sang PDP sa sulod sang 2 ka tuig nga nagpungko ini bilang Senate President.
Dugang pa sini nga ang pagpatigayon sang mass oath taking sa mga bag-o nga myembro nga wala nag-agi sa konsultasyon sang mga lehitimo nga miyembro sang partido.
Gin-insister man ni Garcia nga may abiso halin kay anay Senate President Nene Pimentel, ang founder mismo sang partido kag amay ni Koko ang ila ginpatigayon nga pagsinapol kun sa diin nadesisyunan sang mga ini nga magpili sang bag-o nga mga lider.
Samtang, ginpa-athag man ni Garcia nga ang mga bag-o nga miyembro sang PDP Laban nga nagpanumpa sa ginpatigayon nga mass oathtaking sa pagpamuno nanday Pimentel kag Alvarez ang invalid kag indi suno pagkilalahon sang ila nga partido.
